يوم اسود على مصر

كان يوم اسود يوم ترشيحك
دا كل املنا ان احنا نزيحك
يا ما مشينا في مظاهرات
وهتفنا باعلى الاصوات
رغم العسكر والضباط
مش عاوزينك..مش عاوزينك

احنا الشعب المصري ياريس
عايزينك ترحل وتسيبنا
كل شوية نقول راح يمشي
او يزهق ويسيب الكرسي
وساعتها نحيي الافراح
ونداوي بالحب جراح
ونبدأ نمسح عفن الماضي
وتعود البسمة لشفايفنا
ونقولك بالصوت العالي
مش عاوزينك..مش عاوزينك

كان يوم اسود يوم ترشيحك
خلا الحزن ف مصر بحور
الناس قرفانة يامولانا
صبرت حتى طلوع الروح
بنقولك ارحمنا وغوز
الشعب المصري مش صفوت
ولا سرور وكمال الشاذلي
ولا الفقي وزميله العادلي
الشعب ياريس ملايين
ماشيين في الشارع صابرين
الحزن بينزف من عينهم
والهم متلتل ف قلوبهم
ولما يشوفوا الطلعة الحلوة
في مجلة او تلفزيون
يصرخوا بالصوت المكتوم
مش عاوزينك.. مش عاوزينك

ملايين ضاعت كل امالها
ان يعيشوا حياة ادمية
اجيال ورا اجيال في طاحونة
بيدورو فيها من ولادتهم
لحد مايرحلو عن دنيتهم
وعرقهم تاخده الحرامية

اجيال تايهة ف المحروسة
بيعدوها باليوم والساعة
كل املهم انك تخلع
علشان يلقو حتى مساحة
يتنفسوا فيها بحرية
من غير ما المخبر اياه
ييجي ياخدهم ف الفجرية
ويصرخو من بين القضبان
مش عاوزينك..مش عاوزينك

الشعب ما هوش ابو جينا
ولا رضاه ودلاله علينا
واوامره الي بتمشي صاروخ
ولاهو كوندي الشعنونة
وتشيني ابن المجنونة
دول اسيادك بيساعدوك
على ظلمك واهانتك لينا
مش عاوزين يسمعو اصواتنا
واحنا بنهتف من الاعماق
مش عاوزينك..مش عاوزينك

الشعب مش هو شارون
ولا زميله التاني شيمون
الى بقينا نسترضيهم
لو حتى ها نبوس رجليهم
علشان يرضى عننا بوش
ونقعد ع الكرسي الملعون



الشعب ياريس مستكفي
خمسة وعشرين سنة افساد
خلت صرخات المحروسة
توصل لضفاف الاطلنطي
يمكن امريكا ترحمنا
او حتى ترق لاحزاننا
ما هي فيها حاكمنا المتخفي
سامع صوتنا بنصرخ فيك
مش عاوزينك..مش عاوزينك

الشعب ياريس مش شلة
كل حياتها تمص نخاعنا
وتشرب دمنا وتجوعنا
ولما نقول ياجماعة الرحمة
يبقي عملنا جريمة كبيرة
ولاخرجنا خلاص م الملة

الشعب يا ريس ملايين
هما الصوت العالي الهادر
مش هما الشلة الملعونة
الى بترفع راية الظلمة
وتقضي ايامها المسمومة
بيطوفوا حوالين الكرسي
ويسبحوا للطفل الساحر
الى مقرب ع التسعين
محبوب الملايين الاسر
وابنه ولي العهد الطامح
الى هايخرج لنا م العتمة
يركب بعده الكرسي الشاغر
ومهما نصيح بالصوت العالي
مش عايزينك..مش عايزينك

ها يقولك انا قاعد قاعد
عهدي مالوهشي حدود ولا اخر

الكلمات جميلة جدا يا محمد

لكن لما يمشى الريس

مين غيره ينفع

نستحمله

ايه الابداع ده يا استاذ محمد
بجد جميلة جدا تسلم ايد حضرتك
ياريته يسمع صرختنا دى او يعرف الكلام ده
ولا بلاش افضل
مش هيتأثر ولا هتفرق معاه
ربنا يستر بقى على حضرتك وعلى كل من يدخل التوبيك ويرد
ايه ده انا شكلى هشرف هناك فى طريق one way
only go without return
مش مهم والله يبقى افضل
ألحق بقى حضرتك اقبل ما حد ياخد باله

ههههههههههه


باين عليكى عشرية ياياسمين ومش هاين عليكى فراقه
بس صدقينى فى ناس كتير تنفع مصر ولادة
وعمرانة بناس كتير عاوزة تخدم البلد وتنهض بيها
من الحال السئ الى وصلنا ليه
انتى عارفة المشكلة انه لما يمشى وربناياخد وديعته
الشلة الى موجودة حواليه دلوقتى هى الى هتختار
فاكيد هتختار واحد من الهبيشة الكبار طبعا
انا متاكد انه لو حد جه غيره ممكن يكون اسوا منه
بس ليه مايكونشى عندنا امل انه التغيير يكون للاحسن
وشكرا على مرورك الجميل

[quote name='mona fares' date='Oct 8 2008, 11:32 PM' post='296413']
ايه الابداع ده يا استاذ محمد
بجد جميلة جدا تسلم ايد حضرتك
ياريته يسمع صرختنا دى او يعرف الكلام ده
ولا بلاش افضل
مش هيتأثر ولا هتفرق معاه
ربنا يستر بقى على حضرتك وعلى كل من يدخل التوبيك ويرد
ايه ده انا شكلى هشرف هناك فى طريق one way
only go without return
مش مهم والله يبقى افضل
ألحق بقى حضرتك اقبل ما حد ياخد باله

شاعرتنا صدقينى انا كنت منتظر ردك بعد ماحطيت القصيدة
وبعدين اكيد هيسمعها واكيد سمع غيرها كتير بس طبعا ودن من طين وودن من عجين زى مابيقولو
بس برده لازم نصرخ على الاقل ننفس عن الى جوانا
طبعا الى جوانا للريس كلها مشاعر حب مايتوصفشى
ولا انتى رايك غير كدة
لاحسن نروح فى طريق الى يروح مايرجعشى زى ماقلتى
وشكرا على مرورك الجميل
وماتحرميناش من مشاركاتك

استاذ محمد
انا اكبر شرف لى ان حضرتك تسمح لى بمتابعة مواضيعك الرائعة بل ايضا تقرأ تعقيبى المتواضع والذى لن يرقى ابدا الى مستوى مواضيعكم


بالنسبة للريس فعلا اكيد يعلم مدى حبنا له ومشاعرنا تجاه واكيد عارف اننا بندعى له دايما ولا ايه
بندعى له مش حاجة تانية
نحتاج انا نخرج ما بداخلنا من حب له وللحاشية التى تحيط بيه
نحتاج لصرخات لعله يشعر بهذا ان كنت اظن فى هذا
شكلى كده مصممة أروح الطريق ده ولا ايه
يلا ربنا يستر بقى
شكرا لك اخى الفاضل

اخت منى شكرا على كلامك الجميل

على فكرة فى ناس كتير جدا عاوزين يروحو فى الطريق ده وماشيين فيه

طبعا ماحدش قال غير كدة
احنا بنموت فى دباديبه
هشتكنا وبشتكنا ياريس ده انت رئيس والنعم كويس
ههههههههههههههههههههههه

عندك حق ياحبيب فعلا فيها ريحة نجم
بس ماعرفتش اوصل للى كاتبها
شكرا على مرورك ياحبيب

هههههههههههههههههههههههههههههههههههه
يعنى هيكون اسود من الى بنشوفه وشفناه ولسة هنشوفه ياكيمو
شكرا على مرورك الجميل

محمد انا مليش دعوه بيك و دخلت التوبيك دا غلط هههههههههههه
هتوحشنا

هههههههههههههههههههههههه
شادى حبيب قلبى
ماتيجى معايا
مش عاوز اروح لواحدى

يوم اسود