Estadak Forum > تقريبا امبارح ليلة 27 ليلة القدر أنا شايف الشمس دلوقتى بجد منظر مايتعوضش

waladmuslim

Sep 17 2009, 04:07

سبحان الله

الشمس لسه بتطلع دلوقتى

وشكلها عمرى ماشوفته قبل كدا

قرص أبيض ومش طالع منه غير أشعة قليلة أوى

سبحان الله بجد

غالبا امبارح كانت ليلة القدر والله أعلم

اللى موجود دلوقتى يطلع يشوفها بسرعة

بجد منظر مايتسابش

سبحان الله بجد

والله أعلم بردو

shady2000

Sep 17 2009, 04:12

المشكلة يا احمد ان الكلام دا بسمعه كل سنة و في كل الليالي الوتريه من اشخاص مختلفين!!!!!

princess

Sep 17 2009, 04:14

تصدق يا احمد سبحان الله ولا اله الا الله لسة من دقيقتين بس طلعت البلكونة ولاقيت منظر عمرى ما شفته فى حياتى الشمس فعلا لسة طالعه ومفيهاش اشعه وعماله ابص للشمس بس من غير ما عينى توجعنى ولون السحاب صاااااااااااااااااااااااااااااااااافى وايقنت ساعتها ان امبارح كانت ليلة القدر سبحان الله ولا اله الا الله
ربنا يحققلنا كل امانينا اللى اتمنناها امبارح يارب وتكون هى فعلا ليلة القدر
وكل سنة وانت طيب يا احمد

princess

Sep 17 2009, 04:15

إقتباس(shady2000 @ Sep 17 2009, 05:12 )

المشكلة يا احمد ان الكلام دا بسمعه كل سنة و في كل الليالي الوتريه من اشخاص مختلفين!!!!!

بص يا شادى انا كنت حاسة وناس كتير انها ليلة23 بس ساعتها انا مكنتش شفت الشمس ومنظرها بنفسى ولكن يوم 23 كانت الجو حلو
اما امبارح كانت الدنيا حر اوى اوى بصراحه عندنا وجينا على بالليل وقفت فى البلكونة سقعت
فقولت لاء
بس برضو كده كده الواحد عمل اللى عليه
لكن النهاردة بجد منظر السما غريب اوى

shady2000

Sep 17 2009, 04:19

كدا احمد قال 27 و اميرة قالت 23 و اختي قالت 25 !!!!!
المهم نكون استفدنا من الليالي و من الخير دا
كل سنة و انتم طيبين

princess

Sep 17 2009, 04:21

لالالالالالالالالالالالالا
مش 25 خالص
كان فى واد عسل اوى

تحت البلكونة وماشى بكلب كبير وعمال يضايق بيه العيال وشعال هوهوا
وبعدين الدنيا كانت ساقعه اليوم ده
ولمهم اننا عملنا اللى علينا واجتهدنا فيهم ودعينا وعسى ان ربنا يتقبل مننا ان شاء الله
بسمش25 خالص

shady2000

Sep 17 2009, 04:25

هههههههههههههههه
خلاص يا اميرة متزعقيش
ربنا يتقبل مننا بس

waladmuslim

Sep 17 2009, 04:25

فى ناس قالولى والله إنها ليلة 21 وناس قالوا ليلة 23

أنا ماشوفتش الشمس فى الليلتين دول

بس شوفتها ليلة 25

ودلوقتى

بجد أبعد مايكونوا عن بعض

ليلة 25 كانت حامية جدا وصفرا جدا وأشعتها مالية الدنيا

بس دلوقتى

الشمس بيضا

ومدورة وقرصها باين جدا

وأشعتها قليلة جدا ومش حامية خالص

سبحان الله بجد

كل سنة وانتم طيبين

ياااااااااااااااارب تكون ليلة القدر وربنا يحقق لنا كل اللى اتمنيناه ويجعلنا من عتقاءها يارب

بجد منظر مايتعوضش

لازم يتشاف

أنا أول مرة فى حياتى أشوفها كدا

princess

Sep 17 2009, 04:27

إقتباس(shady2000 @ Sep 17 2009, 04:25 )

هههههههههههههههه
خلاص يا اميرة متزعقيش
ربنا يتقبل مننا بس

ههههههههههههههههههههههههههه
لا وانا اقدر برضو
امين يارب ان شاء الله ربنا يتقبل مننا يارب
وكل سنة وانت واختك طيبين

mohamed sheta

Sep 17 2009, 11:53

كل سنه وأنتم طيبين

بس أنا عندي سؤال

هو ليله القدر بتتعرف من نقاط متفق عليها عرفت من أحاديث السنه النبويه ,

هل تم تخصيص موضوع الشمس والكلاب الي بتهوهو على الرؤيه والتأكيد فى مصر فقط

يعني هى ليله القدر تعرف حين تكتمل شروطها لو أنت فى مصر وبس ؟؟

أصلي عايش فى السويد وفيه سنين الشمس مابتطلعش فى العشر أيام الآخاره خالص

وكلب الجيران وكلاب الحته بتهوهو كل يوم .

يعني أقضي رمضان وتروح عليا فضائل ليله القدر , الا أنزل مصر العشر أيام دول كل سنه

طب ورمضان اللي فى الشتا والأيام كلها زعابيب حنعرف إزاي

أطلب مساعده دار الإفتاء فى هذه القضيه

يا جماعه اليوم مايفرقش إحنا لازم نعيش اليوم بيومه ونديله واجباته كامله

وزي ماتيجي ويارب يقبلها مننا والله أعلم

نوارة

Sep 17 2009, 01:32

يا جماعة اهم حاجة اننا نكون استغلنا رمضان والعشر الاواخر خاصة

والهمة تكون موجودة فى رمضان كامل

بما فيه ليلة القدر وبكدة اكيد ربنا هيبلغنا ليلة القدر

كل سنة وانتم بخير
وسعادة وصحة وسلام يارب

وعيد سعيد عليكم

Fo0oO@H

Sep 17 2009, 02:44

انا كنت حاسة انها ليلة 13 وعشرين
وكانو بيقولو الشمس مش بتبقى بازغة اوى بعنى
المهم انا خرجت وقعدت ابص عالشمس لما عينى اتعمت
ههههههههههههههه
وكل يوم بعمل كده
بس فى 13 كان البيت هادى اوى على غير العادة طبعا وكنا كلنا نفوسنا هادية ومش بنتخانق مع بعض على اى حاجه لازم تكون حاجة غلسة شويه يعنى
والله اعلم